Hajcong, klimatyzacyjo a wentylacyjo HVAC
Systymy hajcowanio, wentylacyje a klimatyzacyje (HVAC) som piyrsze, kej sie rozchodzi ô dowanie dobrego komfortu używoczom stawiynio, a przi tymu som śnich nojwielgsze koszty skuli jego utrzimanio.
Bez zebranie dobrych nasztalowań maszin, kere som tajlom we systymie HVAC, wedle parametrow takich choby na przikłod: ôbecność ludzi, czas ôd dnia abo ôd roku eli stan ôd stawiynio, systym do regiyrowanio inteligyntnym stawiyniym (BMS) zwolo zminimalizować koszty stawiynio, a przi tymu zwielgszyć komfort ôsobow, co som w nim rajn. Jeszcze lepsze efekty dowo sterowanie urzondzyniami HVAC pospoł z inkszymi fonkcyjami ôd stawiynio:
- sterowanie zewnyntrznymi roletami abo żaluzjami fasadowymi
- elektryczne regiyrowanie ôdmykajoncymi sie ôknami
- napasowanie tympyratury wody ôd źdrzodeł ciepłości (plompy ciepłości, piece)
- regiyrowanie hajcongowymi matami (np. we przeciwôblodzyniowych systymach, podgrzywanie zdrzadłow)
- regiyrowanie cyrkulacyjom ciepłej wody do używanio
Ôptymalizacyjo kosztow
Jak fto wejrzi na cyny ôd energije a inkszych mydiow, to gibko spomiarkuje, co ôd mocki lot trzimie sie sam trynd rosnoncy. Prawidła ôd rechtu kożom nom szporować energijo. Po 2020 roku wszyjske stawiynia we Ojropejskij Uniji bydom musieć trzimać sie normow szporowanio energije a puszczanio cieplanianych gazow. Werci sie ô tym pomedykować już dzisiej.
Dobre ôbranie maszin ze systymu HVAC niyskorzij zmyńszy koszty używanio.
Ôptymalizacyjo kosztow ôd energije użytyj bez masziny HVAC biere sie nojwiyncyj z inteligyntnego regiyrowanio nawiewym (wroz z rekuperatorami) i ôptymalnego ôbranio parametrow ôd systymow hajcongu a chłodzynio. Systym komunikuje sie z tymi maszinami i pomiynio jejich nasztalowania tak, coby zminimalizować strata energije. Zbudowanie dobrej logiki fungowanio systymu je nojważniyjsze, kej sie rozchodzi ô ôptymalne używanie energije. Nojlepszy efekt idzie dostać bez skuplowanie roboty wszyskich systymow, kere som ôdpowiedzialne za komfort we stawiyniu.
Bez ciongłe pomiynianie informacyjow miyndzy systymym a maszinami HVAC idzie tyż znojś wszyske felery we fungowaniu tych urzondzyń. Skuli wizualizacyje systymu wszyjske masziny idzie przidać na rys ze stawiyniym. Jak kero bydzie mieć awaryjo, zarozki poznomy, kaj to je. Jak personel mo gibko zaryagować na awaryjo, to dostanie znać ô tym bez wiadomość SMS.
Komfort
Jak niy ma cie w doma, to niy potrzebujesz drogigo komfortu ciepłości. Ciynżko je tyż na gibko patrzeć, coby wyłonczyć a dać pozor na wszyjske masziny do hajcowanio, klimatyzacyje a rekuperacyje w doma. Bez automatyzacyjo tego procesu idzie robić kompozycyje ciepłości, to je nojlepszego do ôbranyj sytuacyje miszongu priorytetow hajcowanio:
- wyłonczanie sztrefy hajcongu, rekuperatora, klimatyzatora po ôdewrziniu ôkna abo dźwiyrzi na tarasa
- sztefowe regiyrowanie ciepłościom wedle bytności domownikow (alarm uzbrojony/rozbrojony) a czasu ôd dnia (zmiynne nasztalowania dlo sztrefy wedle czasu)
- regiyrowanie roztomajtymi źdrzodłami ciepłości wedle parametru ciepłowyj bezwładności (np. spolyganie na zolowym hajcowaniu, kerymu kejnedy dopomogo elektryczne hajcowanie).
Dobro tympyratura, wilgłość we lufcie a dobre miynianie luftu skłodajom sie na komfort bycio we ôbiekcie. Wszyjsko to zoleży ôd dobrego regiyrowanio nawiewym i ôd wydajności klimatyzacyjnych cyntralow. Systym BMS zwolo letko dostać komfort we izbach bez cyntralny panel regiyrowanio, lokalne sterowniki abo mobilne masziny – np. tablety a smartfony.
Nojlepszy efekt idzie dostać bez skuplowanie wszyskich systymow, ôd kerych zoleży komfort we stawiyniu.
Ryakcyjo na ôbtoczynie
Skuli raji czujnikow zainsztalowanych we ôbiekcie systym zwyrtnie zôptymalizuje robota maszin HVAC wedle czasu ôd dnia. Skuli integracyje systymu BMS ze zewnyntrznymi roletami we stawiyniu idzie je zawrzić w nocy, zachować tympyratura we stawiyniu i prziszporować bez to kole 5% nadbytnij energije. BMS zwoli tyż na zoptymalizowano robota stawiynio wedle czasu ôd roku, konta świecynio promiyni ôd słońca na stawiynie a wedle wiatrowyj siyły. Nojlepszy efekt idzie dostać, jak sie do pozor na systym automatyki ôd stawiynio, społpracujonce masziny (np. rolety, wentylacyjne szibry) a forma ôd stawiynio już na etapie projektowanio.
Stawiynie mo ryagować na ôbtoczynie!
Ryakcyjo na używoczy
Budynek mo zachować przijazne warunki pobytu. Niy trza ale trzimać parametrow we tych izbach, kerych prawie sie niy używo. We tych izbach idzie zmyńszyć tympyratura bez zima abo zwielgszyć bez lato, a wentylacyjo niy musi być tako mocno.
Wrocanie sie inwestycyje
Skuli ôptymalnymu regiyrowaniu maszinami HVAC, bez systym inteligyntnygo stawiynio idzie prziszporować aże 30% energije, kerej trza coby zachowac komfortowe parametry luftu we stawiyniu. Dowo to gibke wrocynie sie inwestycyje we systym inteligyntnygo stawiynio. Ekstra szporobności idzie dostać skuli lekszyj ôbsudze stawiynio, a bez to zmyńszyniu kosztow utrzimanio personelu, kery ôbsuguje ôbiekt.
